په هرات کې د سنوکر ملي لوبډلې دیارلسم پړاو ملي ټاکنیزې سیالۍ پیل شوې
د هېواد د سنوکر ملي لوبډلې دیارلسم پړاو ملي ټاکنیزې سیالۍ نن یکشنبه د هرات ولایت په کوربه توب پیل شوې.
د سیالیو د پیل په مراسمو کې د هرات ولایت د ورزش رئیس مولوي ګلاب الدین خپلواک، مولوي محمود مشفق د هرات د ورزش آمر، د هېواد د سنوکر او بلبارد فدراسیون رئیس علي احمد یوسفي او د برخه والو ولایتونو استازیو برخه اخیستې وه.
په پیل کې د لویدیځ زون د سنوکر فدراسیون رئیس بصیر نصیر افضلي د سیالیو په اړه مالومات وړاندی کړل.
ورپسې د هرات د ورزش ریاست مشر مولوي ګلاب الدین خپلواک هر اړخیزه وینا وکړه او ورزشکارانو ته یې ښه راغلاست ووایه، نوموړي وویل: «هرات ولایت له هر پلوه د هېواد له لومړی درجه ولایتونو څخه دی او دادی دا ځل د سنوکر دیارلسم پړاو سیالیو کوربه توب کوي».
ښاغلي خپلواک خوښي څرګنده کړه چې د هېواد د ورزش ریاست هرات ولایت د دې سیالیو لپاره وړ وباله.
ښاغلي خپلواک هوډ څرګند کړ چې د هرات ورزش ریاست په هرات کې د ورزش د لاډیرو شرائطو او زمینه سازی لپاره کار کوي. هرات ولایت د ورزش په برخه کې پریمانه استعدادونه، په ملي او نړیواله کچه لاس ته راوړنې لري.
ښاغلي خپلواک سنوکر د شاهانو لوبه یاده کړه او له ورزش څخه یې د غلطې استفادې د مخنیوي غوښتونکی شو.
د هېواد د سنوکر په ملي ټاکنیزو سیالیو کې له کابل، غور، هرات، فراه او ننګرهار ولایتونو څخه ۱۰۵ تنو ورزشکارانو برخه اخیستې او په دریو عمري ډلبندیو کې به یوه اونۍ دوام ولري.
