پروان کې د شپږو لوبډلو ترمنځ د فوټسال سيالۍ د صداقت لوبډلې په اتلولۍ پای ته ورسېدې
د پروان ولايت د بدني روزنې او ورزش امريت اړوند د فوټبال ملي فدراسیون د استازولۍ له لوري د ياد ولايت د ځوانانو او محصلينو د شپږو لوبډلو ترمنځ د فوټسال سيالۍ، چې يوه اوونۍ مخکې پیل شوې وې د صداقت لوبډلې په اتلولۍ پای ته ورسېدې.
د دغو سياليو په پايلوبه کې صداقت لوبډلې خپلې سیالې ذوالفقار لوبډلې ته د ۳/۱ ګولونو په توپير ماتې ورکړه او اتلولي يې خپله کړه.
د يادو سياليو موخه د فوټسال ورزش ته وده ورکول او د لوبغاړو ترمنځ يووالی رامنځته کول و؛ د سياليو په پای کې غوره لوبډلې او لوبغاړو ته چمتو شوې ډالۍ ورکړل شوې.
