هلمند؛ گرمسېر ولسوالۍ کې د اوو لوبډلو ترمنځ د فوټبال حوزوي ليگ سيالۍ پيل شوې
د هلمند ولايت د بدني روزنې او سپورټ آمريت اړوند د فوټبال فدراسیون د استازولۍ له لوري په لکړۍ فوټبال حوزې کې د اوو لوبډلو ترمنځ د فوټبال حوزوي ليگ سيالۍ، چې درې اوونۍ به دوام وکړي، د منصوري ځوانانو لوبډلې په بريا پيل شوې.
په دغو سياليو کې د اباسين څپې، منصوري ځوانانو، عمري ځوانانو، سپين غر بازانو، پامير اتلانو، اوربل اتلانو، او لکړۍ لېسې لوبډلو گډون کړی، چې لومړۍ لوبه د اباسين څپې او منصوري ځوانانو تر منځ ترسره شوه، چې په پايله کې ۰/۲ گولونو په توپير د منصوري ځوانانو لوبډلې په بريا پای ته ورسېده.
د يادونې وړ ده، چې ياد ليگ هر کال د گرمسېر ولسوالۍ په ټولو فوټبالي حوزو کې ترسره کېږي.
