هلمند؛ ګرمسېر ولسوالۍ کې د اتو لوبډلو ترمنځ د فوټبال ګروپي سیالۍ پای ته ورسېدې
د هلمند ولایت د بدني روزنې او ورزش آمریت اړوند د فوتبال فدراسیون د استازولي له لوري د یاد ولایت په ګرمسېر ولسوالۍ کې د اتو لوبډلو ترمنځ د فوټبال سیالۍ د لکي لوبډلې په اتلولي پای ته ورسېدې.
د یادو سیالیو پایلوبه د لکي او لکړۍ لوبډلو ترمنځ ترسره شوه، چې په پایله کې لوبه یو پر یو ګول مساوي پای ته ورسېده خو په پنالټیو کې لکي لوبډلې د ۴ پر ۳ ګولونو په توپیر خپلې سیالې لوبډلې ته ماتې ورکړه او د سیالیو اتلولي يې په خپل نوم کړه.
دغه سیالۍ د لوبغاړو ترمنځ د همغږي په موخه ترسره شوې، چې درې اوونۍ یې دوام وکړ او په پای کې مطیع الرحمن د سیالیو د غوره لوبغاړي او حکمت الله د غوره ګول وهونکي ډالۍ ترلاسه کړې.
