هلمند؛ په گرشک ولسوالۍ کې د ۱۸ لوبډلو ترمنځ د ټېپ بال کرېکټ سيالۍ پای ته ورسېدې
د هلمند ولايت د بدني روزنې او ورزش امريت اړوند د ټېپ بال کرېکټ فدراسيون د استازولۍ له لوري د یاد ولايت په گرشک ولسوالۍ کې د ۱۸ لوبډلو ترمنځ د ټېپ بال کرېکټ سيالۍ، چې دوې مياشتې مخکې پيل شوې وې د گرشک ځوانانو لوبډلې په اتلولۍ پای ته ورسېدې.
د يادو سياليو پايلوبه د گرشک ځوانانو او آشنا لوبډلو ترمنځ ترسره شوه، چې گرشک ځوانانو لوبډلې په ټاکلو ۱۲ اورونو کې خپلې سيالې لوبډلې ته د ۲۰۹ منډو هدف وټاکه، په مقابل کې آشنا لوبډلې د ټولو لوبغاړو په سوځېدو سره يواځې ۱۵۰ منډې وکړې او لوبه يې د ۵۹ منډو په توپیر وبايلله.
د دغو سياليو موخه د ځوانانو لپاره د سالم مصروفیت برابرول وو، چې په پای کې اتلې لوبډلې ته يو عراده موټرسايکل د انعام په توگه ورکړل شو.
