هلمند؛ په لښکرگاه ښار کې د ۲۰ لوبډلو ترمنځ د ټېپ بال کرکټ شپنۍ سيالۍ پيل شوې
د هلمند ولايت د بدني روزنې او سپورټ امريت اړوند د ټېپ بال کرکټ فدراسيون د استازولۍ له لوري د لښکرگاه ښار په غازي محمد ايوب خان ورزشي لوبغالي کې د ۲۰ لوبډلو ترمنځ د ځوانانو د سالم مصروفیت په موخه د ټېپ بال کرکټ شپنۍ سيالۍ د افغان بازانو لوبډلې په بريا پيل شوې.
د يادو سياليو لومړۍ د افغان بازانو او اميد ځوانانو لوبډلو ترمنځ ترسره شوه، اميد ځوانانو لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۱۱۲ منډو هدف وټاکه، په مقابل کې افغان بازانو لوبډلې ياد هدف په نهم اور کې ترلاسه کړ او د پنځو ويکټو په توپير يې بريا خپله کړه.
ياده دې وي، چې دغه سيالۍ به شاوخوا درې اوونۍ دوام وکړي.
