هلمند؛ مرکز لښکرګاه ښار کې د اتو لوبډلو ترمنځ د فوټبال سیالۍ پای ته ورسېدې
د هلمند ولایت د بدني روزنې او ورزش آمریت اړوند د فوټبال فدراسیون د استازولي له لوري او د فولاد صنعتي شرکت په مالي ملاتړ د ياد ولايت مرکز لښکرګاه ښار کې د اتو لوبډلو ترمنځ د فوټبال سیالۍ د بارک لوبډلې په اتلولي پای ته ورسېدې.
د یادو سیالیو پایلوبه د بارک او نوي عمري لوبډلو ترمنځ ترسره شوه، چې په پایله کې یې بارک لوبډلې د ٢ پر صفر ګولونو په توپیر خپلې سیالې لوبډلې ته ماتې ورکړه او اتلولي یې وګټله.
دا سیالۍ ورزش ته د ودې ورکولو په موخه ترسره شوې چې دوې اوونۍ يې دوام وکړ او پای کې اتلې لوبډلې ته د اتلولي کپ او غوره لوبغاړو ته چمتو شوې ډالۍ ورکړل شوې.
