هلمند، په ګرمیسر ولسوالۍ کې د والیبال حذفي سیالۍ د اتحاد لوبډلې په اتلولۍ پای ته ورسېدې
د هلمند ولایت په ګرمسیر ولسوالۍ کې د شریف الله حبیبي په نوم د والیبال یو ورځنی ټورنمنټ چې اتو لوبډلو پکې ګډون کړی و، د اتحاد لوبډلې په بریا پای ته ورسېد.
په یادو سیالیو کې اتحاد، دروېشان، عمرزي، شاهین، بنادر، صفار،احسان او هزار جفت لوبډلو برخه اخیستې وه پایلوبه د اتحاد او عمرزو لوبډلو ترمنځ ترسره شوه په پایله کې اتحاد لوبډلې وکولای شول خپلې سیالې لوبډلې ته د ۳/۲ میدانونو په توپیر ماتې ورکړه او اتلولي یې په خپل نوم کړه.
د سیالۍ په پای کې د یاد ټورنمنټ مسؤلینو له لوري اول او دوهم نمبر لوبډلو ته کپونه ورکړل شول. د دې سیالیو د ترسره کېدو موخه د ځوانانو ترمنځ یووالی او د والیبال سیالیو پرمختګ یاد شوی.
