نیمروز؛ زرنج ښار کې د ۳۳ لوبډلو ترمنځ د فوټسال څلورم پړاو سیالۍ پای ته ورسېدې
د نیمروز ولایت د بدني روزنې او ورزش آمریت اړوند د فوټبال فدراسیون د استازولۍ له لوري د یاد ولایت مرکز زرنج ښار کې د ۳۳ لوبډلو ترمنځ د رمضان جام فوټسال سیالۍ د نوري لوبډلې په اتلولۍ پای ته ورسېدې.
د یادو سیالیو پایلوبه د نوري اتلان او پیام آزادي لوبډلو ترمنځ ترسره شوه، چې په لومړيو کې لوبه ۱/۱ مساوي شوه، خو د پینالتي په وهلو سره نوري اتلانو وکولی شول، چې خپلې سیالې لوبډلې ته د ۴/۵ ګولونو په توپیر ماتې ورکړي.
یادې سیالۍ د ورزش د ودې او غوره لوبغاړو د موندلو په موخه پیل شوې وې، چې یوه میاشت یې دوام وکړ.
د یادونې وړ ده چې د سیالیو د پای په مراسمو کې د سیالیو د مسؤلانو له لوري اتلې او دویمې لوبډلې ته نغدي ډالۍ، غوره لوبغاړو ته بېلابېلې ډالۍ او نندارچیانو ته د پچه اچونې په ترسره کولو سره اووه عدده آیوا ډوله موبایلونه او لس جوړه ورزشي لباسونه ورکړل شول.
