ننگرهار کې د لسو لوبډلو ترمنځ د فوټبال غوراوي سيالۍ پيل شوې
د ننگرهار ولايت د بدني روزنې او ورزش رياست اړوند د فوټبال ملي فدراسیون د استازولۍ له لوري د ياد ولايت په مرکزي فوټبال لوبغالي کې د لسو لوبډلو ترمنځ د فوټبال غوراوي سيالۍ د پېداگوژي لوبډلې په بريا پيل شوې.
په يادو سياليو کې د پېداگوژي، ننگرهار کلب، افتخار ډرونټه، پامیر، اتحاد، اریانا، عزت الله قاطع، پامیر مندوزي، ارباپها او د ډورنټې ځوانانو لوبډلو گډون کړی، چې په لومړنۍ لوبه کې پېداگوژي لوبډلې خپلې سيالې پامير لوبډلې ته د ۳ پر ۱ گولونو په توپير ماتې ورکړه او لومړۍ بريا يې په خپل نوم کړه.
د يادولو وړ ده، چې دغه سيالۍ به شاوخوا ۴۵ ورځې دوام وکړي او په پای کې به اتله لوبډله د هېواد اتلانو غوره ليگ ته لار پېدا کړي.
