ننگرهار؛ ښېوې ولسوالۍ کې د ۳۰ لوبډلو ترمنځ د ټېپ بال کرېکټ سيالۍ پيل شوې
د ننگرهار ولايت د بدني روزنې او ورزش رياست اړوند د ټېپ بال کرېکټ فدراسيون د استازولۍ له لوري د ياد ولايت په ښېوې ولسوالۍ کې د ۳۰ لوبډلو ترمنځ د ټېپ بال کرېکټ سيالۍ پيل شوې.
د دغو سياليو لومړۍ لوبه د سلام پور ځوانانو او شگې قمري لوبډلو ترمنځ ترسره شوه. د لوبې پچه شگې قمري لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د ټولو لوبغاړو په سوځېدو سره خپلې سيالې لوبډلې ته د ۷۵ منډو هدف وټاکه، په مقابل کې سلام پور ځوانانو لوبډلې ياد هدف د لوبې په وروستي اور کې ترلاسه کړ او سيالي يې د څلورو ویکټو په توپير وگټله.
د يادو سياليو موخه د ځوانانو لپاره د سالمې تفريح برابرول دي، چې شاوخوا يوه مياشت به دوام وکړي.
