ننګرهار؛ مومند درې ولسوالۍ کې د ٧٦ لوبډلو ترمنځ د ټېپ بال کرېکټ سیالۍ پیل شوې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په مومند درې ولسوالۍ کې د ٧٦ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د امان ټایګر او باسول لمر لوبډلو ترمنځ ترسره شوه. د لوبې پچه امان ټایګر لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د اوو ویکټو په زیان خپلې سیالې لوبډلې ته د ١٧٢ منډو هدف وټاکه. باسول لمر لوبډلې د هدف په تعقیب کې د ټولو ویکټو په زیان ١٢٣ منډې وکړې او د ٤٨ منډو په توپیر یې لوبه وبایلله.
دا سیالۍ د ځوانانو لپاره د سالمې بوختیا په موخه پیل شوي دي، چې یوه نیمه میاشت به دوام وکړي.
