ننګرهار؛ روداتو ولسوالۍ کې د ٢٠ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په روداتو ولسوالۍ کې د ٢٠ لوبډلو ترمنځ د ټېپ بال کرېکټ سیالۍ د بانډې رولېکس لوبډلې په اتلولي پای ته ورسېدې.
د یادو سیالیو پایلوبه د بانډې الف او بانډې رولېکس لوبډلو ترمنځ ترسره شوه. د لوبې پچه بانډې الف لوبډلې وګټله او لومړی یې توپوهنه وکړه، چې په ټاکلو لسو اورونو کې یې د شپږو ویکټو په زیان سره خپلې سیالې لوبډلې ته د ١٢٢ منډو هدف وټاکه. بانډې رولېکس لوبډلې د څلورو ویکټو په زیان سره ياد هدف پوره کړ او د سیالیو اتلولي یې وګټله.
دا سیالۍ ورزش ته د ځوانانو د هڅولو په موخه ترسره شوې، چې ٢٠ ورځې یې دوام وکړ.
