د افغانستان د سوکوهنې ملي فدراسيون يوولس کسيزه لوبډله ايران هېواد ته روانه شوه
د المپيک، بدني روزنې او ورزش عمومي رياست اړوند د سوکوهنې ملي فدراسيون ۱۱ کسيزه ملي لوبډله ( ۷ لوبغاړي او يو څلور کسیز پلاوی) د سوکوهنې پهلوان پوريای ولی جام لومړي پړاو نړيوالو سياليو کې د ګډون په موخه ايران هېواد ته روانه شوه.
په دغه سياليو کې به د افغانستان په استازولۍ اووه سوکوهونکي له ۵۰ تر ۹۰ کيلو وزني کټګورۍ کې د خپلو سيالانو پر وړاندې د سيالۍ ډګر ته ښکته شي.
د يادې لوبډلې د مخې ښې په مراسمو کې د هېواد د ورزش عمومي رياست رييس مولوي احمدالله وثيق ، د المپيکي امور رييس داد محمد پاينده اختري، د المپيک کميټې لومړي مرستيال باور هوتک او نورو ورزشي مسوولينو ګډون کړی وو.
د يادې لوبډلې د مخې ښې په مراسمو کې ښاغلي احمدالله وثيق، لوبغاړو ته د اړينو لارښوونو ترڅنګ وويل، «تاسو په دې سیالیو کې د افغانستان استازي ياست، کوښښ وکړئ له خپلو سيالانو سره داسې رويه وکړئ، چې ستاسو له اخلاقو اغيزمن شي او د ښو اخلاقو کپ ګټلو سربېره له مډالونو سره هېواد ته راستانه شئ».
د ۲۰۲۵ سوکوهنې پهلوان پوريای ولي جام لومړی پړاو نړيوالې سیالۍ به د افغانستان په ګډون د ۲۲ هېوادونو ترمنځ د روان کال د اپريل میاشتې پر ۲۶مه نېټه د ايران هېواد په کوربتوب د دې هېواد خوی ښار کې پيل شي، چې د مې میاشتې تر ۳مې نيټې به دوام وکړي.
