میدان وردګ؛ چک ولسوالۍ کې د ٤٠ لوبډلو ترمنځ د ټېپ بال کرېکټ سیالۍ پای ته ورسېدې
د میدان وردګو ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په چک ولسوالۍ کې د ٤٠ لوبډلو ترمنځ د ټېپ بال کرېکټ سیالۍ د مخلص بند چک لوبډلې په اتلولي پای ته ورسېدې.
د یادو سیالیو پایلوبه د مخلص بند چک او حنظله ځواک لوبډلو ترمنځ ترسره شوه. د لوبې پچه حنظله ځواک لوبډلې وګټله او لومړی یې توپوهنه وکړه، چې په ټاکلو اتو اورونو کې یې خپلې سیالې لوبډلې ته د ٨٤ منډو هدف وټاکه. مخلص بند چک لوبډلې ټاکلی هدف د درېیوو ویکټو په زیان د لوبې په پنځم اور کې ترلاسه کړ او د اوو ویکټو په توپیر یې اتلولي وګټله.
دا سیالۍ ورزش ته د ځوانانو د هڅولو او د سالمې تفرېح برابرولو په موخه ترسره شوې، چې یوه اوونۍ یې دوام وکړ.
