میدان وردګ؛ مرکز میدان ښار کې د اتو ولایتونو ترمنځ د والیبال سیالۍ پای ته ورسېدې

د میدان وردګ ولایت د بدني روزنې او ورزش آمریت له لوري د یاد ولایت مرکز میدان ښار په سلمان فارس لېسه کې له اتو ولایتونو د ۳۴ لوبډلو ترمنځ د والیبال څلورم پړاو سیالۍ د عبدالوهاب لوبډلې په اتلولي پای ته ورسېدې.

دغو سیالیو کې له بامیان، غزني، لوګر، کابل، لغمان، کونړ، ننګرهار او میدان ودرګ ولایتونو څخه ۳۴ لوبډلو ګډون کړی و، چې پایلوبه کې یې عبدالوهاب لوبډلې د ۳ پر ۲ میدانونو په توپیر خپلې سیالې ځواک میدان ښار لوبډلې ته ماتې ورکړه او اتلولي یې وګتله.

دا سیالۍ د ورزشکارانو ترمنځ د یووالي په موخه ترسره شوې، چې شپږ ورځې یې دوام وکړ.