میدان وردګ؛ جغتو ولسوالۍ کې د ٣٠ لوبډلو ترمنځ د ټېپ بال کرېکټ سیالۍ پای ته ورسېدې
د میدان وردګو ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په جغتو ولسوالۍ کې د ٣٠ لوبډلو ترمنځ د ټېپ بال کرېکټ سیالۍ د رباط عبید لوبډلې په اتلولي پای ته ورسېدې.
د یادو سیالیو پایلوبه د رباط عبید او بلند بابا خېلو لوبډلو ترمنځ ترسره شوه. د لوبې پچه بلند بابا خیلو لوبډلې وګټله او لومړی یې توپوهنه وکړه، چې په ټاکلو لسو اورونو کې یې د ۶ ویکټو په زیان خپلې سیالې لوبډلې ته د ۱۲۱ منډو هدف وټاکه. رباط عبید لوبډلې ټاکلی هدف د پنځو ویکټو په زیان د لوبې په نهم اور کې ترلاسه کړ او د پنځو ویکټو په توپیر یې اتلولي وګټله.
دا سیالۍ ورزش ته د ځوانانو د هڅولو او د سالمې تفرېح برابرولو په موخه ترسره شوې، چې یوه اوونۍ یې دوام وکړ.
