ميدان وردگ کې د ۳۶ لوبډلو ترمنځ د والیبال سیالۍ پای ته ورسېدې
د ميدان وردگ ولایت د بدني روزنې او ورزش آمريت اړوند د والیبال فدراسیون د استازولۍ له لوري د ياد ولایت په مرکز سلمان فارس عالي لېسه کې له اتو ولايتونو څخه د ۳۶ لوبډلو ترمنځ د والیبال سیالۍ، چې لس ورځې يې دوام وکړ د ميدان اتلانو لوبډلې په اتلولۍ پای ته ورسېدې.
د يادو سياليو په پايلوبه کې ميدان اتلانو لوبډلې خپلې سيالې ځواک ميدان ښار لوبډلې ته د ۰/۳ ميدانونو په توپير ماتې ورکړه او اتلولي يې وگټله.
ياده دې وي، چې د دغو سياليو د پای په مراسمو کې د هېواد د ورزش ادارې عمومي رييس مولوي احمدالله وثيق هم گډون کړی و، چې د لوبغاړو د لا هڅونې په موخه يې لومړي، دويم او درېيم مقام گټونکو لوبډلو ته نغدي ډالۍ ورکړې.
