مولوي احمد الله وثیق د تاتارستان د ورزش د برخې محصلانو ته: افغانستان کولی شي د ورزشي سیالیو او فعالیتونو کوربتوب وکړي

د المپیک ملي کمېټې او سپورټ عمومي رئیس مولوي احمد الله وثیق تاتارستان هیواد ته د خپل رسمي سفر په ترڅ کې د یاد هیواد له یو شمېر ورزشي ځایونو او لوبغالو لیدنه وکړه او هم یې د کازان د المپیک اړوند د روزنیز ورزشي پوهنتون محصلانو ته وینا وکړه.

ښاغلي وثیق په خپله وینا کې وویل: " اوسمهال افغانستان کولی شي د هر ډول ورزشي فعالیتونو او سیالیو کوربتوب وکړي، نوموړي زیاته کړه، چې افغانستان ته د ا.ا په راتګ سره مثالي امن راغلی او همدا امن د دې سبب شوی، چې د هیواد ټولو سیمو ته ورزش او ورزشي برنامې ورسیږي. "

ښاغلي وثیق په خپلو خبرو کې زیاته کړه، چې نن سبا افغانستان ته د مختلفو هیوادونو سیلانیان راځي؛ نو ستاسې د هیواد ورزشي مسولین او لوبغاړي هم کولی شي، چې په ډاډه زړه افغانستان ته راشي او له موږ سره په ورزشي برنامو کې ګډون وکړي.

د یادونې وړ ده، چې د هیواد د ورزش ادارې عمومي رئیس مولوي احمد الله وثیق د تاتارستان هیواد په رسمي بلنه نوموړي هیواد ته تللی او هالته به د فبروري په ۲۱ مه نېټه د سیمې په کچه په جوړېدونکې ورزشي غونډه کې ګډون وکړي.