لغمان؛ په قرغيو ولسوالۍ کې د ۳۰ لوبډلو ترمنځ د ټېپ بال کرېکټ سيالۍ پای ته ورسېدې
د لغمان ولايت د بدنی روزنی او ورزش امريت اړوند د ټېپ بال کرېکټ فدراسيون د استازولۍ له لوري د ياد ولايت د قرغيو ولسوالۍ په سرخکانو کلي کې ۳۰ لوبډلو ترمنځ د ټېپ بال کرېکټ سيالۍ، د حليم ناصري لوبډلې په اتلولۍ پاي ته ورسېدې.
د دغو سياليو پايلوبه د حليم ناصري او برهان خصوصي لېسې لوبډلو ترمنځ ترسره شوې، د برهان خصوصي لېسې لوبډلې د پچې په ګټلو سره د توپ وهنې پرېکړه وکړه، چې په ټاکلو اتو اورونو کې د اتو لوبغاړو په سوځېدو سره مقابلې لوبډلې ته د ۱۳۵ منډو هدف وټاکه. په ځواب کې د حليم ناصري لوبډلې په اووم اور کې د اووه لوبغاړو په سوځېدو سره یاد هدف پوره کړ او د درې ويکټو په توپير يې لوبه وګټله.
د يادو سياليو موخه له نشه یې توکو څخه د ځوانانو لېرې والي و، چې ۲۰ ورځې دوام وکړ.
