لغمان؛ مرکز مهترلام ښار کې د ٤٠ لوبډلو ترمنځ د والیبال سیالۍ پای ته ورسېدې
د لغمان ولايت د بدني روزنې او ورزش آمریت اړوند د والیبال فدراسیون د استازولي له لوري د ياد ولايت مرکز مهترلام ښار کې د ٤٠ لوبډلو ترمنځ د والیبال سیالۍ د ابدالي لوبډلې په اتلولي پای ته ورسېدې.
د یادو سیالیو پایلوبه د ابدالي او جاويد لوبډلو ترمنځ ترسره شوه، چې په پایله کې یې ابدالي لوبډلې د درې پر صفر میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دغه سيالۍ د شاهي کانال د بيا رغونې په ویاړ ترسره شوې چې یوولس ورځې یې دوام وکړ او په پای کې لومړي او دویم مقام ګټونکو لوبډلو ته کپونه، مډالونه او نورې چمتو شوې ډالۍ ورکړل شوې.
