غزني؛ ګیلان ولسوالۍ کې د فوټبال سیالۍ د کامران لوبډلې په اتلولۍ پای ته ورسېدې
د غزني ولایت د بدني روزنې او ورزش امریت له لوري د یاد ولایت په ګیلان ولسوالۍ کې د یادې ولسوالۍ د بېلابېلو کلیو د شپږو لوبډلو ترمنځ د فوټبال سیالۍ، چې دوې اوونۍ مخکې د رسنې کلي په ورزشي میدان کې پیل شوې وې د کامران لوبډلې په اتلولۍ پای ته ورسېدې.
په دغو سیالیو کې د مکتب اتلان، نوي ځوانان، تورغر بازان، میوند اتلان، قریشي زمریان او کامران لوبډلو ګډون کړی وو؛ په پایله کې کامران لوبډلې وکولای شول پایلوبه کې خپلې سیالې قریشي زمریانو لوبډلې ته د ۴/۱ ګولونو په توپیر ماتې ورکړه او اتلولي یې په خپل نوم کړه.
د دې سیالیو د ترسره کېدو موخه د فوټبال ورزش ته وده ورکول او ځوانانو ترمنځ یووالی ښودل شوی؛ د سیالۍ په پای کې غوره لوبډلې ته د اتلولۍ کپ او غوره لوبغاړو ته جایزې، مډالونه او ستاینلیکونه ورکول شول.
