د کابل ښار د کلاسيک پاورلفټنګ شپږم پړاو ټاکنيزې سيالۍ پای ته ورسېدې
د بدني روزنې او ورزش عمومي ریاست په ٥٠٠ کسيز ورزشي جمنازيوم کې د کابل کلاسيک پاورلفټنګ منتخبې لوبډلې د ټاکلو سيالۍ چې تېره یکشنبه پیل شوې نن پای ته ورسېدې.
دغه سیالۍ چې موخه يې د پاورلفټنګ ورزش ته وده ورکول او د کابل منتخبې لوبډلې ټاکل وو، د نویو ځوانانو، ځوانانو، لويانو مخکښانو کټګوريو په څلورو وزنونو کې ترسره شوې او په مختلفو وزنونو کې د مختلفو کلبونو ورزشکارانو لومړی دویم او درېیم مقامونه ترلاسه کړل.
په دغو سياليو کې تر ٢٧٠ کيلو وزن پورې سيالۍ وشي، چې په ترڅ کې يې ٢٧ تنه د کابل منتخبې لوبډلې لپاره وټاکل شي.
د یادونې وړ ده چې د دغو سیالیو د پای په مراسمو کې د ورزشي مسولینو له لوري غوره ورزشکارانو ته د لومړي دویم او درېیم مقام مډالونه، د قهرمانۍ حکمونه او کپونه ورکړل شول.
