د هنري جمناستیک د اصولو او مقرراتو دوه ورځنی سمینار پای ته ورسېد
د بدني روزنې او ورزش عمومي ریاست اړوند جمناستيک فدراسیون له لوري د هنري جمناستیک ٣٥ لوبڅارانو او روزونکو ته د همدې څانګې د اصولو او مقرراتو اړوند سمینار ورکړل شو.
په همدې موخه په جوړو شوو مراسمو کې د المپیک ملي کمېټې او سپورټ عمومي رئیس الحاج مولوي عبدالودود حقاني، د همدې ریاست د اطلاعاتو او عامه پوهاوي رئیس الله محمد اتل مشواڼي، ورزشي مشاورینو، د جمناستیک فدراسیون مسوولینو، لوبڅارانو او روزونکو ګډون کړی و.
په پیل کې د بدني روزنې او ورزش عمومي رئیس الحاج مولوي عبدالودود حقاني ګډونوالو ته ښه راغلاست ووایه زیاته یې کړه: جمناستیک د ټولو ورزشونو مالګه ده او ټول ورزشونه په جمناستیک ښکلي دي، دغه سمینار چې د همدې ارزښتمن ورزش اړوند ترسره شوی، هیله لرم چې لوبڅارانو او روزونکو بشپړ معلومات ترلاسه کړي وي او پر مټ یې یادې برخې ته نور قوت هم وروبښي.
ورپسې د جمناستیک فني معاون محمد فهیم قیومي د جمناستیک اړوند د شته ستونزو پر اړه خبرې وکړې زیاته یې کړه: په تېرو دوو وروستیو کلونو کې منو چې ورزش په چټکۍ سره وده کړې او لا هم د ودې په حال کې دی؛ خو د جمناستیک په برخه کې شته ستونزې لاهم موجودې دي چې له جملې یې د جمناستیکي ورزشونو لپاره د یوه ځانکړي جمنازیوم نشتون دی، ده غوښتنه وکړه چې په دې برخه کې ورسره باید همکاري وشي.
هېره دې نه وي چې د یاد سمینار په پای کې لوبڅارانو او روزونکو ته ستاینلیکونه او چمتو شوې ډالۍ ورکړل شوې.
