د هرات ګلران ولسوالۍ د فوټسال سیالیو اتلولي بدري لوبډلې وګټله
د هرات په ګلران ولسوالۍ کې د فوټسال سیالۍ چې څه موده وړاندې پیل شوې وې د بدري لوبډلې په اتلولۍ پای ته ورسېدې.
د دې سیالیو پایلوبې کې د هرات ولایت د بدني روزنې او ورزش رئیس ګلاب الدین خپلواک او مل پلاوي يې، د ګلران ولسوال سعدالدین صدیقي، یو شمېر نور ملکي او نظامي چارواکو، ورزشي مسوولینو، مخورو، ورزشکارانو او ګڼ شمېر مینوالو ګډون کړی وو.
دا سیالۍ د ۱۶ لوبډلو ترمنځ د ګلران ولسوالۍ په لېسه کې پیل شوې وې، پایلوبه یې د « بدري او نوجوانان الف» لوبډلو ترمنځ وشوه چې د بدري په اتلولۍ او نوجوانانو په دویم مقام پای ته ورسېدې.
د پای په مراسمو کې ګټونکې لوبډلې ته کپ او غوره لوبغاړو ته مډالونه او نورې جایزې ورکړل شوې.
