د فیفا په فوروارډ ورکشاپ کې د فوټبال فدارسیون د مسؤولینو ګډون؛ د فیفا له لوري د فوټبال فدراسیون د بودیجې لېږد ته هیلې ډیرې شوي
د افغانستان د فوټبال فدراسیون لومړۍ رده مسؤولینو د فیفا په فارورډ ورکشاپ کې چې د جولای له ۵مې تر ۷مې په دوبۍ کې جوړ شوی و، ګډون کړی دی.
په دې ورکشاپ چې د مرکزي او جنوبي اسيا د فوټبال فدراسیونونو مسؤولینو پکې ګډون کړی و، د برخوالو هېوادونو په ښوونځيو کې د فوټبال د پروګرامونو پر پلي کېدو تمرکز او ټینګار شوی.
له ورکشاپ وروسته د افغانستان فوټبال فدراسیون مسؤولینو د فیفا له مسوولینو سره ناسته وکړه، چې د فدراسیون پر مشر یوسف کارګر، طاهر رووفي او ډاکټر بهرام صدیقي سربېره د یاد فدراسیون مرستیال حافظ احمد جان او د اجرایوي کمېټې غړي عبدالحق فیضي هم حضور درلود.
د یادې کتنې په ترڅ کې له لومړي ورکشاپ وروسته، مالي ورکشاپ هم ترسره شو، چې د افغانستان د فوټبال فدراسیون په مالي ستونزو او ننګونو پکې بحث وشو.
د فوټبال فدراسیون مسؤولین وایي د فیفا له مشرتابه سره یې له دې ناستې وروسته دې ته هیلې زیاتې شوي، چې فیفا به د فوټبال فدراسیون بودیجه افغان لوري ته ولېږدوي. مالي ورکشاپ چې له لومړي ورکشاپ وروسته جوړ شو، د افغانستان د فوټبال فدراسیون پر مالي ستونزو پکې خبرې وشوې. له دې غونډې وروسته دا هیلې زیاته شوي، چې فیفا به د فدراسیون بودیجه افغان لوري ته ولېږدوي او ورسره به د یاد فدراسیون مالي ستونزې حل شي.
دا په داسې حال کې ده، چې څه موده وړاندې د هیواد د ورزش ادارې مشرتابه د یو مکتوب په لېږلو د افغانستان د فوټبال فدراسیون داخلي چارې مستقلې یادې کړې او پکې ویل شوي وو، چې د فیفا او اې. ایف. سي منشور او اصولو ته به ممانعت نه کیږي.
