د خوست په صبریو ولسوالۍ کې د ۴۰ لوبډلو ترمنځ د والیبال سیالۍ پیل شوې
د خوست د بدني روزنې او ورزش امریت په ملاتړ د والیبال فدراسیون له خوا د یعقوبیو صبریو ولسوالۍ مولیو خورۍ په کلي کې د نشه یي توکو پر ضد د والیبال سیالۍ پیل شوې.
په همدې موخه په جوړو شو مراسمو کې د والیبال فدراسیون مسؤل زمري سیلاني، د همدې ولسوالۍ ملکي او نظامي چارواکو، مخورو مشرانو ، ورزشکارانو او د ورزش ګڼو مینوالو برخه اخیستې وه.
په دې ټورنمینټ کې ۴۰ لوبډلې ګډون لري، چې یوه نیمه میاشت به دوام وکړي.
زمري سیلاني دې مراسمو ته د خبرو پر مهال وویل: په دې وروستیو کې ورزش په ټولو رشتو کې ډېر پرمختګ کړی او دا پرمختګ په ټولو ولسوالیو کې ښه پرمخ روان دی.
د سیمې مشرانو او مسؤلینو مننه وکړه، چې مرکزي ادارې د دوی په سیمه کې ورزش ته پاملرنه زیاته کړې ده.
د دې سیالیو موخه، یووالی، د ورزش وده او ليرې پرتو سیمو ته د ورزش رسول دي.
د ټورنمنټ په لومړۍ سیالۍ کې د "اسمعیل خېلو نور احمد او لکڼو رکیم" لوبډلو ترمنځ پیلیزه لوبه ترسره شوه، چې د نور احمد لوبډلې په ګټه پای ته ورسېده.
د یادولو وړ ده، چې لوبډلو ته د تګ را تګ مالي لګښت هم ورکول کیږي او د پایلوبې ګټونکو لوبډلو ته پسونه په نظر کې نیول شوي.
