د جودو د اسیايي کمېټې نوی رئیس بیا ځلې عبید النزي وټاکل شو

د جودو نړیوال فدراسیون د اسیايي کمېټې رئیس بیاځلې عبید النزي وټاکل شو. یادې ټاکنې په هغې ناسته او کانګرېس کې ترسره شوې، چې د اسیا د ۳۱ ملکونو د استازو په شتون کې د روانې عیسوي میاشتې اپریل له ۲۶ تر ۲۷ تاریخ پورې په کويټ کې جوړ شوی و.

له افغانستان څخه په یاد کانګریس کې د جودو فدراسیون رئیس ذبیح الله نظري ګډون کړی و. ښاغلي نظري په نوموړي کانګريس کې د ګډون ترڅنګ د جودو نړیوال فدراسیون له مسولینو، په ځانګړي ډول له عبید النزي سره ملاقات وکړ. له نوموړي سره په لیدنه کې یې د افغانستان د جودو فدراسیون د فعالیتونو پر اړه معلومات ورکړل او هم یې د ځینو ستونزو یادونه وکړه.

د عبید النزي له خوا ښاغلي نظري ته پوره ډاډ ورکړل شو، چې د افغانستان له جودو فدراسیون سره به پوره همکاري کوي او هم به په سیالیو کې ورته د رغنده ګډون زمینه جوړوي.

باید یادونه وشي، چې له یاد کانګرېس څخه وروسته د ګډون کوونکو ملکونو د ورزشکارانو له خوا پر ۲۸ او ۲۹ تاریخ د جودو سیالۍ هم ترسره شوې.