خوست کې د ۳۲ لوبډلو ترمنځ د ټېپ بال کرېکټ سیالۍ پیل شوې
د خوست ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري د یاد ولایت مرکز اړوند غرغښت سیمه کې کې د ۳۲ لوبډلو ترمنځ د غرغښت غوره لیګ څلورم پړاو ټېپ بال کرېکټ سیالۍ پیل شوې.
د یادو سیالیو لومړۍ لوبه د لکڼزي نیازي او شعیب لوبډلو ترمنځ ترسره شوه. د لوبې پچه لکڼزي نیازي لوبډلې وګټله او لومړی یې توپ وهنه وکړه چې په ټاکلو لسو اورونو کې یې د خپلو اتو لوبغاړو په له لاسه ورکولو سره خپلې سیالې لوبډلې ته د ۹۲ منډو هدف وټاکه. شعیب لوبډلې ټاکلی هدف د خپلو دوو لوبغاړو په له لاسه ورکولو سره د لوبې په اتم اور کې ترلاسه کړ او د اتو ویکټو په توپیر یې د دغو سیالیو لومړۍ بریا یې په خپل نوم ثبت کړه.
دا سیالۍ د ځوانانو ترمنځ د یووالي په موخه پیل شوي دي، چې درې میاشتې به دوام وکړي.
