خوست کې د ١٢ ولسوالیو ترمنځ د ټېپ بال کرېکټ سیالۍ پای ته ورسېدې
د خوست ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري او د AYSO مؤسسې په مالي ملاتړ په ١٢٠٠ فاميليو سیمه کې د ١٢ ولسوالیو ترمنځ د ټېپ بال کرېکټ سیالۍ د اسماعیل خېلو مندوزیو ولسوالۍ په اتلولي پای ته ورسېدې.
د یادو سیالیو پایلوبه د اسماعیل خېلو مندوزیو ولسوالۍ او مرکز متون لوبډلو ترمنځ ترسره شوه. د لوبې پچه اسماعیل خېلو مندوزیو ولسوالۍ لوبډلې وګټله او لومړی یې توپوهنه وکړه، چې په ټاکلو اتو اورونو کې یې د خپلو څلورو لوبغاړو په له لاسه ورکولو سره خپلې سیالې لوبډلې ته د ١١٨ منډو هدف وټاکه. متون لوبډلې د هدف په تعقیب کې د خپلو پنځو لوبغاړو په له لاسه ورکولو سره ٧٩ منډې وکړې او د ٣٨ منډو په توپیر یې لوبه وبایلله.
دا سیالۍ د ځوانانو ترمنځ د یووالي په موخه ترسره شوې چې یوه اوونۍ یې دوام وکړ او په پای کې اتلې لوبډلې ته لس زره افغانۍ او دویم مقام لوبډلې ته پنځه زره افغانۍ د ډالۍ په توګه ورکړل شوې.
