خوست کې د شپږو لوبډلو ترمنځ د ټېپ بال کرکټ سیالۍ پای ته ورسېدې
د خوست ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري د ياد ولايت مرکز متون ښار کې د شپږو لوبډلو ترمنځ د ټېپ بال کرکټ سیالۍ د مفتون لوبډلې په اتلولي پای ته ورسېدې.
د یادو سیالیو پایلوبه د دانش او مفتون لوبډلو ترمنځ ترسره شوه. د لوبې پچه مفتون لوبډلې وګټله او لومړی یې د توپ وهنې پرېکړه وکړه چې په ټاکلو اتو اورونو کې د خپلو څلورو لوبغاړو په له لاسه ورکولو سره خپلې سیالې لوبډلې ته د ١٠٧ منډو هدف وټاکه. دانش لوبډلې د هدف په تعقیب کې ٩٩ منډې وکړې او لوبه یې د اوو منډو په توپیر وبایلله.
يادې سیالۍ د سیمې د ځوانانو لپاره د سالمې تفرېح د برابرولو په موخه ترسره شوې چې ٢٠ ورځې یې دوام وکړ او په پای کې غوره لوبغاړو ته چمتو شوې ډالۍ ورکړل شوې.
