خوست کې د اتو لوبډلو ترمنځ د والیبال سیالۍ پای ته ورسېدې
د خوست ولایت د بدني روزنې او ورزش امریت اړوند د والیبال فدراسیون د استازولۍ له لوري د ياد ولايت د مرکز اړوند ١٢٠٠ فاميليو په شيخ زاید ورزشي جمنازيوم کې د اتو لوبډلو ترمنځ د والیبال سیالۍ د کابل منتظر لوبډلې په اتلولۍ پای ته ورسېدې.
د دغو سیالیو پایلوبه د کابل منتظر او بلال مندوزي لوبډلو ترمنځ ترسره شوه، چې په پایله کې یې کابل منتظر لوبډلې د ٣/٠ میدانونو په توپیر خپلې سیالې لوبډلې ته ماتې ورکړه او اتلولي یې وګټله.
دا سیالۍ د شيخ زاید ورزشي جمنازيوم د پرانیستې په ویاړ پیل شوې وې، چې څلور ورځې یې دوام وکړ او په پای کې اتلې لوبډلې ته ٥٠ زره افغانۍ او دویم مقام ګټونکې لوبډلې ته ٢٥ زره افغانۍ د ډالۍ په توګه ورکړل شوې.
