خوست؛ گربزو ولسوالۍ کې د ۱۶ لوبډلو ترمنځ د ټېپ بال کرېکټ سيالۍ پيل شوې
د خوست ولايت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د گربزو ولسوالۍ په بوريخېلو کلي کې د ۱۶ لوبډلو ترمنځ د ټېپ بال کرېکټ لس اوريز ليگ سيالۍ پيل شوې.
د يادو لومړۍ لوبه د شېرشي اتلانو او شيخ امير تندر لوبډلو ترمنځ ترسره شوه. د لوبې پچه شېرشي اتلانو لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د شپږو لوبغاړو په سوځېدو سره خپلې سيالې لوبډلې ته د ۱۷۴ منډو هدف وټاکه، په مقابل کې شيخ امير تندر لوبډلې د ټولو اورونو په لوبولو سره ۱۴۳ منډې وکړې او لوبه يې د ۳۱ منډو په توپير وبايلله.
د يادونې وړ ده، چې دغه سيالۍ د ليگ په شکل ترسره کېږي او شاوخوا يوه مياشت به دوام وکړي.
