خوست؛ د شېر تڼي په نوم د ٧٠ کلبونو ترمنځ د کرکټ ټېپ بال سيالۍ پيل شوې
د خوست ولایت ورزش امريت د خپل کلني پلان پر اساس د کرکټ ټېپ بال فدراسیون له لوري په تڼيو ولسوالۍ کې د داخلي ٧٠ کلبونو ترمنځ د شېر تڼي په نوم د کرکټ ټېپ بال سيالۍ پيل شوې.
د دغو سياليو د پيل لوبه د فقير اباد ځلميو او احسان سټار لوبډلو ترمنځ وشوه، چې احسان سټار لوبډلې د لوبې پچه وګټله او د فقير اباد ځلمو لوبدلې ته يې توپوهنې بلنه ورکړه.
د فقير اباد لوبډلې په ټاکلو ١٢ اورونو کې د اووه لوبغاړو په سوځېدو سره ١٠٧ منډې وکړې.
په مقابل کې د احسان سټار لوبډلې ورکړل شوى هدف د لوبې په ٩ اور کې د شپږو لوبغاړو په زيان پوره کړ.
په دې لوبه کې ننګيال د ٦٠ منډو په کولو سره د لوبې د غوره لوبغاړي جايزه ترلاسه کړه.
د خوست ولایت د ورزش مسوولین وايي؛ د دې ډول ټورنمنټونو لړۍ به د خوست ټولو ولسواليو ته وغځول شي، چې په ترڅ کې به يې د هرې ولسوالۍ د کرکټ ټېپ بال منتخبې لوبډلې هم وټاکل شي.
