خوست؛ الګاډې لوبډلې د ځاځي میدان ولسوالۍ د رمضان جام والیبال سیالیو اتلولي وګټله
د خوست ولایت د بدني روزنې او ورزش آمریت اړوند د والیبال فدراسیون د استازولي له لوري او د عرفان ځاځي په مالي ملاتړ د یاد ولایت د ځاځي میدان ولسوالۍ په عباس خېلو کلي کې د ۲۶ لوبډلو ترمنځ د والیبال رمضان جام سیالۍ د الګاډې لوبډلې په اتلولي پای ته ورسېدې.
دغو سیالیو ۱۵ ورځې دوام وکړ، چې پایلوبه یې د الګاډې او سټیوان لوبډلو ترمنځ ترسره شوه، چې په پایله کې یې الګاډې لوبډلې د ۳/۰ میدانونو په توپیر خپلې سیالې لوبډلې ته ماتې ورکړه او اتلولي ېې په خپل نوم کړه.
د یادو سیاليو د پای په مراسمو کې د یادې سیمې مشرانو، ورزشکارانو او د ورزش ګڼو مینوالو ګډون کړی و او اتلې لوبډلې ته د اتلولي کپ او بېلابېلې چمتو شوې ډالۍ ورکړل شوې.
