تخار؛ مرکز تالقان کې د ۸۰ ورزشکارانو ترمنځ د تکواندو څوارلسم پړاو ټاکنیزې سیالۍ ترسره شوې
د تخار ولایت د بدني روزنې او ورزش امریت اړوند د تکواندو ملي فدراسیون د استازولۍ له لوري د یاد ولایت په مرکز تالقان کې د ۸۰ ورزشکارانو ترمنځ د تنکیو ځوانانو، نویو ځوانانو او د ځوانانو په عمري کټګوریو کې د تکواندو څوارلسم پړاو ټاکنیزې سیالۍ ترسره شوې.
د دغو سیالیو په پایله کې له هرې کټګورۍ ۱۳ تنه ورزشکاران، چې ټول ۴۰ ورزشکاران کېږي د تخار ولایت د تکواندو منتخبې لوبډلې ته وټاکل شول.
د یادو سیالیو موخه له هرې کټګورۍ د تخار ولایت د تکواندو منتخبې لوبډلې ته د غوره لوبغاړو موندل و.
د سیالیو په پای کې غوره ورزشکارانو ته کپ، مډالونه او ستاینلیکونه ورکړل شول.
