بدخشان؛ ارغنج خواه ولسوالۍ کې د وزلوبې دویم پړاو سیالۍ پای ته ورسېدې
د بدني روزنې او ورزش لوی ریاست په همغږي د وزلوبې، نیزه وهنې او سیمه ييزو لوبو ملي فدراسیون له لوري او د یما پطرولیم په مالي ملاتړ د بدخشان ولایت د ارغنج خواه ولسوالۍ په شېوه دښته کې د شپږو لوبډلو ترمنځ د وزلوبې سیالۍ چې شپږ ورځې مخکې پیل شوې وې، د آمو لوبډلې په اتلولي پای ته ورسېدې.
په دغو سياليو کې د شېوې، آمو، سپین غر، هندوکش، پامير او البرز لوبډلو ګډون کړی و، چې په پایلوبه کې یې آمو لوبډلې د ٣ پر صفر نمرو په توپیر هندوکش لوبډلې ته ماتې ورکړه او اتلولي یې په خپل نوم کړه.
د سياليو د پای په مراسمو کې د وزلوبې ملي فدراسیون رئیس غلام سرور جلال، د المپیک، بدني روزنې او ورزش لوی ریاست تللي پنځه کسیز پلاوي، د بدخشان ولایت ورزشي آمر عبدالبصیر نیرومند، د بېلابېلو ولایتونو د وزلوبې فدراسیونونو استازو، د بدخشان ولایت دولتي چارواکو او د وزلوبې زرګونو مینوالو ګډون کړی وو.
په دغو مراسمو کې د وزلوبې ملي فدراسیون رئیس ښاغلي غلام سرور جلال د لوبې په بریالۍ توګه ترسره کېدو خوښي څرګنده کړه او ويې ويل چې پلان لري په راتلونکي کې هم د افغانستان په تاريخي سيمو کې د وزلوبې د لا پرمختګ لپاره دغه ډول سیالۍ ترسره کړي.
ښاغلي جلال زیاته کړه: (دوه میاشتې وروسته په قزاقستان کې د وزلوبې نړۍوالې سیالۍ ترسره کېږي او هڅه کوو چې له همدا ډول سياليو څخه د ملي لوبډلې لپاره غوره لوبغاړي وټاکوو.)
د سياليو د پای په مراسمو کې لومړي او دویم مقام ګټونکو لوبډلو ته کپونه او غوره لوبغاړو ته مډالونه د ډالۍ په توګه ورکړل شول.
د وزلوبې ملي سیالۍ هر کال د هېواد په بېلابېلو سيمو کې ترسره کېږي خو دا دویم ځل دی، چې د بدخشان په لېرې پرتې سیمې شېوې دښته کې يادې سیالۍ ترسره کېږي او زرګونه مینوال يې د لیدو لپاره راځي.
