باميان؛ د خورشيد لوبډلې د فوټبال سياليو اتلولي ترلاسه کړه
دغه سيالۍ ۱۹ ورځې وړاندې د ۹ لوبډلو ترمنځ پيل شوې وې، چې د خورشيد او شهرداري لوبډلو د سياليو پايلوبې ته لار موندلې وه او د خورشيد لوبډلې وکولای شول خپل سيال ته په ماتې ورکولو سره د دغو سياليو اتلولي خپله کړي.
د ورزشي مسوولینو په وینا د یادو سیالیو د ترسره کولو موخه په بامیانو کې د فوټبال لوبې ته وده ورکول او ورزش ته د ځوانانو هڅول دي.
د دغو سیالیو په پای کې د المپیک ملي کمېټې او ورزش عمومي رئیس انجنیر نظرمحمد مطمئن او ورسره ملګري پلاوي برخه اخیستې وه او د خپل خبرو په ترڅ کې زیاته کړه: خوښ یم چې د دوهم ځل لپاره بامیان ته سفر کوم او د فوټبال د یوې په زړه پورې لوبې شاهدان یو.
هغه زیاته کړه: تاسو ټولو لوبغاړو سره موږ ژمنه کوو چې د افغانستان د فوټبال او والیبال غوره لیګ به ډیر ژر په کابل کې د 34 ولایتونو د لوبغاړو په ګډون پیل شي.
هغه د خپلو خبرو په دوام وويل: "ملي تلويزيون د دغو لیګونو د خپرولو په برخه کې د هر راز همکارۍ ژمنه کړې ده، انشاالله موږ به یو با کيفيته او معياري ليګ ولرو."
دا لوبې په داسې حال کې ترسره کېږي، چې د بدني روزنې او ورزش عمومي رييس تېره ورځ باميانو ته د ورزش د حالت د ارزونې او د واليبال او لامبو د سياليو د ليدنې په موخه یاد ولایت ته سفر وکړ.
