افغان ورزشکارانو د رزمي ورزشونو اسیایي سیالیو کې دوه مډالونه وګټل
افغان ورزشکارانو د رزمي ورزشونو څلورم پړاو اسیایي ته د لار موندنې سیالیو کې یو د سپینو زرو او یو د برنزو مډال وګاټه.
په دغو سیالیو کې سمیع الله حمیدي په ۶۵ کیلو ګرامه وزن کې خپلې لومړۍ دوه لوبې له چیني او منګولیایي سیالانو وګتلې؛ خو درېیمه لوبه کې یې د ازبکستاني سیال پر وړاندې ماته ومنله او د سپینو زرو یې په خپل نوم کړ. او پروېز کاپیساوال په ۵۶ کیلو ګرامه وزن کې د برنزو مډال په خپل نوم کړ.
په دغو سیالیو کې د افغانستان په استازولۍ ۱۳ ورزشکاران ۴ روزونکي او یو هیئت ګډون لري.
یادې سیالۍ د ۲۳ هېوادونو په ګډون د ازبکستان هېواد په کوربهتوب په تاشکند ښار کې د روانې میلادي میاشتې پر ۲۲مه پیل شوي او د همدې میاشتې تر ۲۴مې نېټې به دوام وکړي.
