افغان فوټبال ملي لوبډله د ايران پر وړاندې د سيالۍ ډګر ته ښکته کېږي
د افغانستان فوټبال ملي لوبډله د مرکزي اسيا اتلولۍ سياليو (کافا) کې د خپلې لومړۍ لوبې د ترسراوي په موخه نن مازيګر ۰۴:۳۰ بجې د ايران فوټبال ملي لوبډلې پر وړاندې د سيالۍ ډګر ته ښکته کېږي.
افغانستان فوټبال ملي لوبډله به د دغه سياليو په B ګروپ کې د ايران، تاجکستان او هندوستان سره سيالۍ ترسره کړي.
د مرکزي اسيا فوټبال اتلولۍ سيالۍ ( کافا) به نن د تاجکستان په کوربتوب د افغانستان په ګډون د ۸ هیوادونو ترمنځ پيل شي، چې د روان ميلادي کال د سپتمبر مياشتې تر اتمې نيټې به دوام وکړي.
