ارزگان کې د ۲۴ لوبډلو ترمنځ د رمضان جام په نوم د ټېپ بال کرېکټ شپنۍ سيالۍ پيل شوې
د ارزگان ولايت د بدني روزنې او ورزش امريت اړوند د ټېپ بال کرېکټ فدراسيون د استازولۍ له لوري د ياد ولايت په مرکز ترينکوټ ښار کې د ۲۴ لوبډلو ترمنځ د رمضان جام په نوم د ټېپ بال کرېکټ شپنۍ سيالۍ پيل شوې.
د دغو سياليو لومړنۍ لوبه د گولډن سټار او ارزگان کېنگ لوبډلو ترمنځ ترسره شوه، ارزگان کېنگ لوبډلې د لوبې پچه وگټله او لومړی يې د توپ وهنې پرېکړه وکړه، چې په ټاکلو لسو اورونو کې د ټولو لوبغاړو په سوځېدو سره سيالې لوبډلې ته د ۸۰ منډو هدف وټاکه، په مقابل گولډن سټار لوبډلې ياد هدف په پنځم اور کې ترلاسه کړ او د اتو ویکټو په توپير يې بريا خپله کړه.
د يادو سياليو موخه ورزش ته د ځوانانو هڅول دي، چې شاوخوا ۲۹ ورځې به دوام وکړي.
