ميدان وردگ؛ په چک ولسوالۍ کې د ۱۸ لوبډلو ترمنځ د ټېپ بال کرکټ سيالۍ پای ورسېدې
د ميدان وردگ ولايت د بدني روزنې او ورزش امريت په همغږۍ د چک ولسوالۍ په گوډه ذولفقار کلي کې د ۱۸ لوبډلو ترمنځ د ټېپ بال کرکټ سيالۍ د کولالانو لوبډلې په اتلولۍ پای ته ورسېدې.
د يادو سياليو پايلوبه د کولالانو او ذولفقار لوبډلو ترمنځ ترسره شوه، کولالانو لوبډلې د لوبې پچې په گټلو سره په ټاکلو لسو اورونو کې سيالې لوبډلې ته د ۱۰۰ منډو هدف کېښود، ذولفقار لوبډلې ياد هدف ترلاسه نه کړ او د ۶۶ منډو په توپير يې ماته ومنله.
د دغو سياليو د ترسره کېدو موخه د ورزشکارانو ترمنځ يووالی وو، چې شاوخوا ۲۰ ورځې يې دوام وکړ او په پای کې لومړي، دويم، درېيم مقام گټونکو لوبډلو ته کپونه او غوره لوبغاړو ته ستاينليکونه او چمتو شوې نغدي ډالۍ ورکړل شوې.
