کابل؛ د باسکټبال شپږم پړاو د غوراوي درې پر درې سبک سیالۍ د کابل (الف) لوبډلې په بریا پای ته ورسېدې
د باسکټبال درې پر درې سبک د غوراوي سیالیو شپږم پړاو، چې پنځه ورځې وړاندې د ۸ لوبډلو او ۴۰ لوبغاړو په ګډون پیل شوی و؛ د کابل (الف) لوبډلې په اتلولۍ پای ته ورسېد.
د دې سیالیو په پای لوبه کې د کابل (الف) او هرات لوبډلو له یو بل سره لوبه وکړه، چې کابل (الف) لوبډلې د ۱۸ امتیازونو په ترلاسه کولو سره لومړی مقام او د هرات لوبډلې د ۱۳ امتیازونو په ګټلو سره ددې پړاو د غوراوي سیالیو دویم مقام وګاټه.
د يادونې وړ ده، چې د دغو سياليو په پایلوبه کې چې د ددې ریاست په ۵۰۰ کسیز جمنازیوم کې ترسره شوه؛ د بدني روزنې او سپورټ عمومي رياست تخنيکي او مسلکي مرستيال حافظ احمد جان، د بدني روزنې او سپورټ رياست د دفتر رئيس مولوي فضل الرحمن بري، د فوټبال فدراسیون رئیس یوسف کاګر، د عامه پوهاوي او اطلاعاتو رئیس اتل مشواڼي، اړوندو مسوولانو او ګڼو نندارچیانو ګډون کړی وو.
د دغو سیالیو د ترسره کولو موخه د باسټکبال د درې پر درې سبک سیالیو ته د وړ او ځوانانو څېرو موندل او بهرنیو سیالیو ته استول وو.
د یادونې وړ چې د دې سیالیو له منځه ۱۲ تنه ورزشکاران د باسکټبال د ملي لوبډلې لپاره غوره شول.
