د درې رشتو ۱۱ افغان ورزشکاران په اسيايي سياليو کې د ګډون په موخه چین ته روان شول
د بدني روزنې او ورزش عمومي رياست اړوند د پهلوانۍ، جوجيتسو او کراتې ۱۱ ورزشکارانو، هيئت او روزونکو د ياد رياست له رعمومي رئيس مولوي احمدالله وثيق سره تر خدای پامانۍ وروسته د چين هيواد هانګژو ښار ته سفر وکړ.
د خدای پامانۍ په دغو مراسمو کې د المپيک ملي کمېټې او سپورټ عمومي رئيس مولوي احمدالله وثيق په اسيايي سياليو کې د افغان ورزشکارانو په ګډون خوښي څرګنده کړه او ويې ویل: تمه لرو چې په دغو سياليو کې ښه وځلېږئ او د افغانستان لپاره وياړونه راوړئ. ده همداراز وويل: د لوبې ګټل او بايلل حتمي وي؛ خو تاسو هم له اوس څخه په دې موخه سفر پيل کړئ چې هيواد ته اتلولۍ راوړئ او ډکې منګولې راوګرځئ.
ښاغلي وثيق زیاته کړه: تاسو د افغانستان په استازولۍ ځئ او هر يو د افغانستان د يوه سفير حيثيت لرئ، نو غوښتنه لرو چې د افغانستان د اسلامي فرهنګ ښه استازولي وکړئ او ټولو ملي، فرهنګي او اسلامي شعايرو ته په اوليت قايل واوسئ. نوموړي همداراز وويل: د سياليو پر وخت نړيوال معيارونه په پام کې ونيسئ، قوي همغږي ولرئ او د مشرانو اطاعت وکړئ.
هېره دې نه وي چې په دغو سيالو کې تر دې دمه افغان ورزشکارانو په مختلفو برخو کې لاسته راوړنې لرلې دي او تمه ده چې ياد ورزشکاران به هم ښې لاسته راوړنې ولري.
