د تکواندو د ملي لوبډلې د غوراوي لسم پړاو سیالۍ د کابل لوبډلې په اتلولۍ پای ته ورسېدې
د تکواندو ملي لوبډلې د غوراوي لسم پړاو سیالۍ چې د ځوانانو په عمري ډلبندۍ کې له ۲۴ ولایتونو د لسو وزنونو لرونکو ۲۸۰ ورزشکارانو ترمنځ د زمري په لومړۍ نېټه پیل شوې وې، د کابل لوبډلې په لومړي مقام ګټلو سره پای ته ورسیدې.
ددې سیالیو موخه د هېواد د تکواندو د ځوانانو ملي لوبډلې ته د غوره څېرو ټاکل وو.
د سیالیو په پایله کې ۴۰ تنو ورزشکارانو ملي لوبډلې ته لاره ومونده او همدارنګه د کابل ولایت لوبډلې د ۳۸ امتیازونو په ګټلو سره لومړی مقام، هرات د ۱۱ امتیازونو په ګټلو سره دویم،تخار د ۱۰ امتیازونو په ګټلو سره درېیم، جوزجان له ۱۰ امتیازونو سره څلورم او بلخ ولایت د اتو امتیازونو په ګټلو سره پنځم مقام خپل کړ.
د یادونې وړ ده چې استاد طغیان اسلام زی، استاد جواد میرزایي او استاد عبدالرحمن حضرتي د غوره لوبڅارانو، استاد قاسمي د غوره روزونکي او تمیم الرحمن د سیالیو د غوره ورزشکار په توګه وټاکل شو.
