کابل؛ د فوټبال د دوهم او درېیم لیګ سیالۍ په غازي لوبغالي کې دوام لري
د کابل ښار د فوټبال دويم ليګ د اتو لوبډلو په ګډون، چې د غبرګولي په ١٧مه پيل شوى په کې څلور لوبې ترسره شوې، چې د ميوند لوبډله په ډېرو نمرو سره د جدول په سر کې ده.
د دغه لیګ په دوام کې به نن دوه لوبې ترسره شي، چې په کې د فیروزي او افغان ملي لوبډلې یو له بل سره سیالي وکړي او د کوهدامن او صلح لوبډلې به یو له بل سره د لوبې ډګر ته ننوځي.
له بلې خوا د کابل ښار په درېیم لیګ کې ۱۱ لوبډلو ګډون لري او د غبرګولي په ۲۱ مه پیل شوی، چې په کې د داوودزي لوبډله د زیاتو نمرو په لرلو سره د جدول په سر کې ده.
د یادولو وړ ده چې د درېیم لیګ سیالیو په دوام به سبا یوه لوبه ترسره شي چې په کې به د یورش او یما شهید لوبډلې له یو بل سره سیالي وکړي.
