ننګرهار؛ کوټ ولسوالۍ کې د څلوېښت لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په کوټ ولسوالۍ کې د ٤٠ لوبډلو ترمنځ د ټېپ بال کرېکټ سیالۍ د قاسم لوبډلې په اتلولي پای ته ورسېدې.
د یادو سیالیو پایلوبه د سدیس او قاسم لوبډلو ترمنځ ترسره شوه. د لوبې پچه سدیس لوبډلې وګټله او لومړی یې توپ وهنه وکړه، چې په ټاکلو لسو اورونو کې یې د څلورو ویکټو په زیان خپلې سیالې لوبډلې ته د ١٥٨ منډو هدف وټاکه. قاسم لوبډلې ټاکلی هدف د لوبې په وروستي اور کې د پنځو ویکټو په زیان پوره کړ او د پنځو ویکټو په توپیر یې د دغو سیالیو اتلولي وګټله.
دا سیالۍ لوی اختر د نمانځلو په موخه ترسره شوې، چې یوه میاشت یې دوام وکړ او په پای کې اتلې لوبډلې ته یو عراده موټر سایکل ورکړل شو.
