پکتیکا؛ یحیی خېلو ولسوالۍ کې د ٣۶ لوبډلو ترمنځ د ټېپ بال کرېکټ سیالۍ پای ته ورسېدې
د پکتیکا ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت په یحیی خېلو ولسوالۍ کې د ٣۶ لوبډلو ترمنځ د ټېپ بال کرېکټ سیالۍ د غيبي خېلو لوبډلې په اتلولي پای ته ورسېدې.
د یادو سیالیو پایلوبه د غیبي خېلو او کابل مغلو لوبډلو ترمنځ ترسره شوه. د لوبې پچه غيبي خېلو لوبډلې وګټله او لومړی یې توپوهنه وکړه، چې په ټاکلو اتو کې یې د درېوو ویکټو په زیان خپلې سیالې لوبډلې ته د ١١۶ منډو هدف وټاکه. مغلو لوبډلې د هدف په تعقیب کې د دوو ویکټو په زيان ٩٣ منډې وکړې او ٢٢ منډو په توپیر یې لوبه وبایلله.
دا سیالۍ لیرې پرتو سیمو ته د ورزش رسولو په موخه ترسره شوې، چې ١۵ ورځې یې دوام وکړ او په پای کې اتلې لوبډلې ته یو عراده موټرسايکل ورکړل شو.
