کندهار کې د ٣٢ لوبډلو ترمنځ رمضان جام په نوم د فوټبال سیالۍ پای ته ورسېدې
د کندهار ولایت د بدني روزنې او ورزش ریاست اړوند د فوټبال فدراسیون د استازولۍ له لوري د ياد ولايت په مرکز عینو مینې ښارگوټي کې د ٣٢ لوبډلو ترمنځ د رمضان جام په نوم د فوټبال سیالۍ د روح الله فضل لوبډلې په اتلولۍ پای ته ورسېدې.
د دغو سیالیو په پایلوبه کې روح الله فضل لوبډلې خپلې سیالې سليمي لوبډلې ته د ۱/۰ ګولونو په توپير ماتې ورکړه او اتلولي يې وګټله.
دغه سيالۍ د روژې مياشتې په مناسبت ترسره شوې، چې شاوخوا ۲۰ ورځې يې دوام وکړ او په پای کې اتلې لوبډلې ته د اتلولۍ کپ او غوره ورزشکارانو ته چمتو شوې ډالۍ ورکړل شوې.
