کندهار فوټبال فدراسیون له مهمند بین المللي روغتون سره روغتیایي هوکړه لاسلیک کړه
د کندهار ولایت د فوټبال فدراسیون د بدنې روزنې او ورزش ریاست په مرسته له مهمند ۲۰۰بستریز بین المللي روغتون سره د لوبغاړو د تداوي دوه اړخیزه هوکړه لاسلیک کړله.
دغه هوکړه د کندهار فوټبال فدراسیون مسئول مولوي حزب الله مهاجر، فني مرستیال حبیب جان په هلو ځلو لاسلیک شوه چې عمومي معاینات، عملیات، اکسرې او انستیزي بخشونه پکي شامل دي.
د مهمند روغتون او فوټبال فدراسیون مسؤلینو په خبره، د دې کړې له مخې هغه ورزشکاران چې د دې ولایت له فوټیال فدراسیون سره ثبت دي کولای شي چې په ۴۰سلنه تخفیف سره له ذکر شویو خدمتونو څخه برخمن شي.
د مهمند ۲۰۰بستریز روغتون مشر حاجي صدیق د هېواد له ملي او بین المللي سوداګرو څخه دی چې تل یې هڅه کړې تر څو هېوادوالو او ورزشي ټولنې ته غوره خدمتونه وړاندې کړي.
د کندهار فوټبال فدراسیون او لوبډلو لوبډلمشرانو په دې هوکړه خوښي څرګنده کړه او د دې خدمت په پار یې له مهمند روغتون مشرتابه څخه مننه وکړه.
